6Nigerië

Meer gelowiges word jaarliks in Nigerië weens hul geloof vermoor as op alle ander plekke in die wêreld gesamentlik. Die aanvalle is dikwels wreedaardig en kan die vernietiging van eiendomme, ontvoerings vir ʼn losprys, seksuele geweld en die dood insluit. Gelowiges word van hul lewensbestaan gestroop en uit hul huise verdryf.

Geweldpleging deur Islamitiese ekstremistiese groepe soos die Fulani-militante, Boko Haram en die Islamitiese Staat in die Wes-Afrika Provinsie (ISWAP) het tydens Muhammadu Buhari se presidentskap toegeneem, wat Nigerië in die episentrum van geteikende geweld teen die Kerk geplaas het. Die regering se versuim om Christene te beskerm en oortreders te straf, het militante se invloed verder versterk.

Christene wat in die Sharia-state (Islamitiese wetgewing) van Noord-Nigerië woon, kan as tweedeklasburgers ook diskriminasie en onderdrukking in die gesig staar.

Ontmoet pastoor Zachariah

“Ek pleit by ons dierbare broers en susters in Christus om my te help bid dat God my sal ondersteun om vir ons vier oorblywende kinders te kan voorsien. Hulle is by my nadat my vrou gesterf het. En dat God hulle sal aanmoedig om vas te hou aan Hom en dat hulle nooit sal omdraai nie.”

Pastoor Zachariah, wat sy vrou en seun in Mei 2023 tydend ʼn aanval op sy dorpie verloor het.

Wat doen Geopende Deure om te help?

Geopende Deure werk deur plaaslike kerkvennote om Christene in Nigerië met dissipelskap- en vervolgingsvoorbereidsopleiding, traumasorg, noodleniging en ekonomiese bemagtigingsprojekte te bereik.