3Jemen

Die lewe in Jemen, wat deur die burgeroorlog uitmekaar geskeur is, is baie swaar vir almal en nog swaarder vir Christene. Die land is in gebiede verdeel wat hoofsaaklik deur drie verskillende magsgroepe beheer word, terwyl sommige dele steeds deur Al-Qaeda en die sogenaamde Islamitiese Staat beheer word. Nie een van die betrokke magsgroepe is simpatiek teenoor Christene nie en die amptelike grondwet handhaaf die Islamitiese Sharia-wetgewing, wat geen godsdiensvryheid toelaat nie.

Die 1% Jemeniete uit die minderheidsgodsdienste word erg gemarginaliseer. Plaaslike Moslem-groepe en moskees versprei meestal noodleniging en diskrimineer na bewering teen enigiemand wat nie as ʼn toegewyde Moslem beskou word nie.

As iemand uitgewys word as ʼn Christen of betrokke is by Christelike aktiwiteite, kan hulle ernstige monitering, arbitrêre aanhouding, marteling, mishandeling en selfs die dood in die gesig staar. In Houthi-beheerde gebiede is dit gevaarlik om ʼn Bybel of ander Christelike boeke te besit. Om Islam te verlaat en Christus te volg, word as verraad teenoor jou inheemse stam gesien. Sommige van die strawwe wat deur die gemeenskap hiervoor uitgedeel word, sluit in verwerping, onterwing, egskeiding, die wegneem van kinders, verbanning en die dood.

Ontmoet Zahrah

“Soms wanneer ek ʼn huis binnegaan, weet ek dat ek dalk nie weer sal uitkom nie. Hulle kan jou na die ekstremiste of die polisiekantoor neem, en dit is waar die ondervraging begin. Hulle kan jou selfs ter dood veroordeel … Ek kan nie die Bybel saam met my dra nie. Hulle kan my by enige kontrolepunt langs die pad deursoek, dus probeer ek soveel moontlik Skrif voor my besoeke memoriseer.”

Zahrah (naam verander) se vriend is in die straat doodgeskiet.

Wat doen Geopende Deure om te help?

Geopende Deure ondersteun die Liggaam van Christus in Jemen deur gebedsondersteuning te versterk, noodleniging te versprei, asook gelowiges en pastore op te lei. Verder word skuiling, beskerming en lewensondersteuning aan vervolgde gelowiges en hul familielede gebied.