42Indonesië

Die situasie vir Christene het die afgelope paar jaar agteruitgegaan, met die Indonesiese samelewing wat toenemend deur konserwatiewe interpretasies van Islam beïnvloed word. Meningspeilings wys gereeld dat veral jongmense konserwatiewe sienings huldig en verordenings rakende Islamitiese kleredrag word algemener.

Talle bekeerlinge vanaf Islam ervaar druk van hul gesinne, maar die intensiteit hiervan hang af van die individuele gesin en plek. Die meeste druk op Christen-bekeerlinge neem die vorm aan van isolasie, verbale mishandeling en uitsluiting. Slegs ʼn klein persentasie bekeerlinge staar fisiese geweld in die gesig weens hul Christelike geloof en kan ook gedwing word om na ʼn ander deel van Indonesië te verhuis. Die druk is ook intenser in plekke soos Wes-Java of Aceh, waar radikale Islamitiese groepe ʼn groot invloed op die samelewing en politiek uitoefen.

Afhangende van die streek, ondervind sommige kerkgroepe ook struikelblokke om toestemming vir die bou van kerke te kry. Selfs al slaag hulle daarin om aan al die wetlike vereistes te voldoen (en wen hulle hofsake), kan die plaaslike owerhede dit steeds ignoreer.

Ontmoet Raymond

“Soms hoor ek hoe my skoolmaats dinge sê soos: ‘Haai, as jy ʼn Christen bly, sal jy ook gekruisig word net soos jou Jesus gekruisig is.’ Hulle spot op dié manier met ons Christene. Ek neem nie aanstoot nie. Ek is gewoond daaraan om dit te hoor.”

Raymond (naam verander), ʼn jong gelowige wat ʼn kamp vir Christen-kinders in Indonesië bygewoon het.

Wat doen Geopende Deure om te help?

Geopende Deure se plaaslike vennote versterk vervolgde Christene in Indonesië met Bybels en Christelike boeke, sosio-ekonomiese bemagtigingsprojekte, dissipelskap- en vervolgingsvoorbereidheidsopleiding en noodleniging.