46Colombië

Die brose vrede tussen die regering en guerrillagroepe in Colombië het ʼn beperkte impak gehad. Alhoewel die geweld afgeneem het, het guerrillagroepe, wat dikwels aan dwelmbendes verbind word, se mag en beheer van sekere gebiede toegeneem. Hierdie groepe teiken dikwels Christene in hul aanvalle, veral wanneer hulle vermoed dat gelowiges die kartelle of bendes se “besigheid” teenstaan. Kerkleiers is veral in gevaar omdat daar aangeneem word dat hulle meeding om ʼn invloed op jongmense uit te oefen, wat ʼn groot deel van die guerrillagroepe se geledere uitmaak.

In sommige gemeenskappe kan Christen-predikante en inheemse bekeerlinge vyandigheid in die gesig staar omdat hulle as verraaiers gesien word wat hul stamme en gemeenskappe verraai het. Hierdie gelowiges loop die gevaar van uitsetting uit die gemeenskap, tronkstraf, uitsluiting en ander strawwe.

Laastens is daar tekens dat Colombië se openbare sektor al hoe minder tot ware pluralisme verbind is. Christene wat in die openbaar oor hul oortuigings praat, word soms geteiken omdat hulle kwansuis diskriminerend is of haatspraak bevorder. Om hierdie rede kies sommige mense om hulself te sensor.

Ontmoet David

“Ek is nie na aan my broer of suster nie, en ek is van my swaer vervreem. Wanneer jy die Evangelie verkondig, word jy nie meer as deel van jou gesin gesien nie. Jy kan ook jou reg om in die gemeenskap te werk verloor as jy die Evangelie deel. Ek het nie meer die reg om te werk nie omdat ek, as ʼn Christen, hul vertroue verloor het.”

David (naam verander), ʼn inheemse gelowige in Colombië.

Wat doen Geopende Deure om te help?

Geopende Deure versterk die vervolgde Kerk in Colombië deur Bybelverspreiding, opleiding, traumasorg, gemeenskapsontwikkelingprojekte, noodleniging en hulp in regskwessies.