19China

Die mees openlike vervolging in China vind dikwels plaas in streke waar Boeddhisme of Islam die meerderheidsgodsdiens is. Vervolging en diskriminasie versprei egter stadig oor die grootste deel van China.

Die Chinese Kommunistiese Party se doel is om te verseker dat kerke nie van die amptelike riglyne af wegbeweeg nie. Kerke wat aanspraak maak op Christus as Koning, word dus met agterdog bejeën, veral omdat Christenskap as ʼn Westerse invloed beskou word. Kinders onder 18 jaar word steeds verbied om kerk toe te gaan. Die meeste kerke word gemonitor en kan sonder waarskuwing gesluit word.

Die Kerk in China word ook deur digitale vervolging geraak. Beperkings wat in 2018 ingestel is, as deel van ʼn breedvoerige wet op godsdiens, het dit moeiliker gemaak vir Christene om die Internet of sosiale media te gebruik om hul geloof te beoefen. Intussen kan elke burger verseker wees dat nie een van hul digitale voetspore buite die staat se radar is nie.

Ontmoet Qiang

“Ons voel gespanne, bang en bekommerd, want dit is die eerste keer wat ons só iets teëkom. Word ons op die swartlys geplaas – sal ons reise beperk word? Ons het nie nou ʼn antwoord hierop nie. Maar ons is dankbaar dat, ná die voorval, ons broers en susters nooit ophou om vir mekaar te bid nie en mekaar ophef met woorde van bemoediging.”

Qiang (naam verander) en sy vrou is albei beboet en vir vyf dae aangehou omdat hulle “byeenkomste onwettig aanbied”. Hulle het na ʼn ander provinsie gevlug, maar word steeds gesoek aangesien hul boete onbetaald bly.

Wat doen Geopende Deure om te help?

Geopende Deure ondersteun gelowiges in China deur plaaslike vennote en kerke met dissipelskap- en vervolgingsvoorbereidheidsopleiding, hulp om die jonger geslag gelowiges te dien en deur gekontekstualiseerde Christelike literatuur aan gelowiges te voorsien wat vanaf Islam of Boeddhisme tot bekering gekom het.