15Algerië

Algerië se belangrikste dryfvere vir vervolging is die samelewing en ekstremistiese Islamitiese onderwysers wat die staatsowerhede beïnvloed. Die meeste Algerynse Christene is bekeerlinge vanaf Islam en staar teistering en diskriminasie in hul daaglikse lewens in die gesig. Hul gesinne en gemeenskap kan hulle probeer dwing om voort te gaan om aan Islamitiese norme en praktyke te voldoen. Hulle ondervind ook druk van beide die regering en hul omliggende gemeenskappe om hul geloof in Jesus te verloën en na Islam terug te keer.

Boonop het staatsdruk op Protestantse Christene tot ʼn vlak toegeneem wat in dekades nog nie gesien is nie. Voorheen geslote kerkgeboue is steeds gesluit en talle ander kerke is beveel om toe te maak. Die regering het gedreig om sommige kerkleiers te vervolg indien hul kerke sou voortgaan om bymekaar te kom.

Algerië het wette wat nie-Moslem-aanbidding beperk. Dit sluit reëls in wat enigiets verbied wat “die geloof van ʼn Moslem sal skud” of gebruik kan word as ʼn “manier van verleiding om ʼn Moslem na ʼn ander godsdiens te bekeer”. Dié onduidelike wette kan gebruik word om Christene aan te spoor om hul geloof stil te hou.

Ontmoet Naasima

“Die grootste uitdaging is dat ek met ʼn dubbele identiteit moet saamleef. Dit beteken ek is ʼn Christen by die huis en ʼn Moslem buite.”

Naasima (naam verander), ʼn Christen-vrou wat in Noord-Afrika woon.

Wat doen Geopende Deure om te help?

Geopende Deure werk saam met plaaslike vennote en kerke in Noord-Afrika om leierskapsopleiding, dissipelskap, lewensbestaanondersteuning, Bybels en pastorale sorg te voorsien.