10Afganistan

Die internasionale gemeenskap het die omvang van die Taliban se wrede bewind waargeneem sedert hulle in Augustus 2021 die regering oorgeneem het. Sedertdien het Afganistan ten minste ʼn mate van politieke stabiliteit ervaar, maar dié stabiliteit het tot verpletterende druk en geweld teen minderheidsgroepe uitgebrei.

Wat die Taliban betref, huisves Afganistan nie Christene nie. Die meeste huiskerke wat voor die Taliban bestaan het (al moes hulle weggesteek word), is gesluit omdat gelowiges gedwing is om te vlug of selfs verder ondergronds te gaan.

Indien ʼn Afgaan se Christelike geloof bekend raak, kan dit ʼn doodsvonnis beteken of hulle kan aangehou en gemartel word om inligting oor medegelowiges te verskaf. Die omliggende samelewing en gesinstruktuur laat nie ruimte toe vir godsdiensvryheid nie en dié onbuigsame standpunt word ook deur die regering gehuldig. Dit beteken dat Christene – byna almal bekeerlinge vanaf Islam – hul geloof geheim moet hou, anders kan hulle eenvoudig net verdwyn.

Ontmoet Yasaman

“Sommige mense het weens my man se Christelike bedrywighede agterdogtig geraak. Vroeg een oggend, toe hy gaan brood koop, het twee mense hom agtervolg. Hy is naby ons huis aangeval en vermoor.”

Yasaman (naam verander), ʼn geheime gelowige in Afganistan.

Wat doen Geopende Deure om te help?

Geopende Deure werk deur vennote om Christene in Afganistan te versterk. Ons kan nie besonderhede verskaf oor hoe ons hulle ondersteun nie, aangesien die situasie te gevaarlik is. Maar ons kan wel sê dat ons broers en susters ons gebede broodnodig het.