skip to Main Content

Samson kies om lief te hê omdat God liefde is – e2110


Samson kies om lief te hê omdat God liefde is

Hoe kan jy lief wees vir iemand wat jou duidelik haat of die God wat jy dien haat? Dit was die situasie waarin Samson* en sy gesin van Mianmar hulself bevind het.

Toe Samson en sy gesin Boeddhisme verlaat het en Jesus Christus as hul Here en Redder aangeneem het, was die mense met wie hulle eens goed klaargekom het met woede en haat gevul omdat Samson geweier het om na Boeddhisme terug te keer.

Samson het een oggend opgemerk dat vyf vragmotors besig was om honderde klippe reg voor sy huis af te laai. Hy het aangeneem dat die klippe vir padherstelwerk bedoel was, maar hy was nog nooit so verkeerd oor iets nie.

Vroeg die volgende oggend, terwyl Samson en sy gesin besig was om te bid, het hulle stemme buite gehoor. Dit was die dorpshoof se stem, en hy was nie alleen nie.

“Maak hom dood! Samson, vra jou God om jou nou te red!”

Die geskreeu het al harder geword: “MAAK HOM DOOD!” Toe was daar stilte. Die eerste klip het hul huis getref, gevolg deur die een klip na die ander.

Hulle het nêrens gehad om heen te gaan nie. Terwyl die mense hul huis met klippe bestook het, het hulle tot God gebid vir bevryding.

Die skare het selfs probeer om hul huis af te brand deur die smeltdraad van die kragkabel se paal af te trek om ʼn brand te begin. Samson en sy gesin het egter uitgeroep: “Here Jesus, help ons asseblief! As U ons nie help nie, gaan ons binnekort sterf!” Asof dit so bestem was, het die elektrisiteit meteens afgegaan. Die lewendige stroom en elektriese skokke het opgehou.

Samson se dogter het daarin geslaag om vir hulp te bel en iemand van die kerk het die voorval aan die polisie gerapporteer. Die mense was verstom dat Samson en sy gesin oorleef het.

Kort ná die aanval is Samson en sy gesin deur ʼn Geopende Deure-vennoot ingeneem om by hom in ʼn skuilhuis te bly. Hy kon klagtes lê teen sy gesin se aanvallers, maar het verkies om hulle te vergewe.

“ʼn Polisiebeampte het na ons gekom en die pastoor wat ons gehelp het gevra of ons ʼn saak wou maak. Ons het gesê dat ons nie ʼn saak wou maak nie. Ons sal hulle vergewe. Ons sal geduldig wees. Sedert ek Jesus aangeneem het, kan ek enigeen liefhê. Selfs as mense my haat, kan ek hulle liefhê omdat God ʼn liefdevolle God is. God is liefde,” sê Samson.

Samson en sy gesin kon oor die jare sedert die aanval in die skuilhuis aanbly.

“Ek wil God graag bedank, en ek wil ook almal bedank wat ons finansieel ondersteun en met hul woorde bemoedig. Mag God julle al meer seën, en mag julle aanhou om meer vir ander mense te doen. Ek wil graag dankie sê en ek bid vir julle. Die glorie van God het gemanifesteer omdat julle my gehelp het.”

Dankie dat jy gelowiges soos Samson help om veiligheid in skuilhuise te vind wanneer hulle weens hul geloof moet vlug. En dankie dat jy hulle met jou finansiële geskenke help om te oorleef! Jou ondersteuning help om die lig van Christus te skyn in van die vyandigste plekke om ʼn Christen te wees. Indien jy vandag in staat is om te gee, oorweeg dit asseblief biddend om meer Christene soos Samson te help.

*Naam weens sekuriteitsredes verander.

Back To Top
×Close search
Soek