25Oesbekistan

Oesbekistan se outoritêre regime gaan voort om godsdiensvryheid deur ʼn godsdienswet te beperk. Dié regulasie vereis dat alle godsdiensgroepe moet registreer om aan godsdienstige aktiwiteite deel te neem.

Alhoewel alle Christene ʼn mate van druk ervaar, beleef amptelik geregistreerde kerke, soos die Russies-Ortodokse Kerk, minder monitering van die regering. Hulle is nie geneig om met die Oesbekiese bevolking te meng nie en word dus as minder van ʼn bedreiging beskou. Nie-tradisionele kerke – veral dié wat nie kan registreer nie – word veral aan polisieklopjagte, dreigemente, arrestasies en boetes blootgestel. Die Baptiste-, Evangeliese en Pinkstergroepe loop die grootste gevaar en word deur die regering as “ekstremiste” beskou. Hulle word daarvan verdink dat hulle spioene is wat die regering probeer omverwerp.

Christene vorm ʼn klein minderheid in dié oorwegende Moslem-kultuur. Inheemse gelowiges wat vanuit ʼn Moslem-agtergrond kom, ondervind groot druk van hul gesinne, plaaslike gemeenskappe en die owerhede.

Ontmoet Aziz

“Ná my bekering tot die Christendom wou my broer niks met my te doen hê nie. Hy het baie kwaad geword toe hy my gesien het en gesê: ‘Gaan weg, wat maak jy hier? Ek wil niks met jou te doen hê nie!’ Ons het vir 20 jaar nie kontak met mekaar gehad nie.”

Aziz (naam verander) is ʼn gelowige vanuit ʼn Moslem-agtergrond wie se verhouding met sy broer ná 20 jaar herstel is.

Wat doen Geopende Deure om te help?

Geopende Deure versterk vervolgde Christene in Sentraal-Asië met die verskaffing van Bybels en Christelike literatuur, Bybelse en beroepsopleiding, sosio-ekonomiese ontwikkelingsprojekte en kinder-, jeug- en vrouebedienings.