• Georganiseerde korrupsie en misdaad
Onlangse nuus
28Sentraal-Afrikaanse Republiek
Die Sentraal-Afrikaanse Republiek (SAR) is sedert 2013 in voortslepende konflik gewikkel – en vervolging het in dié tyd min verander. Talle faksies (insluitend Rusland se berugte Wagner-huursoldate) wat by die dekade lange oproer betrokke was, is regtens van menseregteskendings beskuldig, selfs nou terwyl hulle ʼn groot deel van die land beheer.
Christen-leiers wat dit waag om geweld in die openbaar te veroordeel, word gedreig en hul kerkgeboue word afgebrand en geplunder. Sommige van die militante wat teen die regering gekant is, teiken die Christelike gemeenskap en in baie streke wat die rebellegroepe beheer, loop gelowiges die gevaar van ontvoering, moord, seksuele geweld en ander gruweldade. Militante dwing gelowiges ook om by hul geledere aan te sluit, wat verwoeste gesinne en gemeenskappe agterlaat.
Dié konflik het gelei tot die ontworteling van duisende Christene wat gedwing is om in kampe te woon en hul huise en lewensbestaan te verloor. Benewens die onsekerheid en geweld, staar bekeerlinge vanaf Islam ook vervolging (verstoting, druk en aanvalle) deur hul onmiddellike familielede en plaaslike gemeenskap in die gesig.
Ontmoet Zakia
“Een Sondag ná die kerkdiens het my man ʼn paar kliënte opgelaai om hulle na die buurdorpie te neem. Gewapende Fulani-mans het hom voorgekeer en hom geskiet. Christene is hul voorkeurteikens.”
Zakia, ʼn weduwee in die SAR wie se man deur militante vermoor is terwyl hy ʼn taxi bestuur het.
Wat doen Geopende Deure om te help?
Geopende Deure werk deur plaaslike vennote om gelowiges in die Sentraal-Afrikaanse Republiek te ondersteun met vervolgingsvoorbereidheidsopleiding, ekonomiese bemagtigingsprojekte en traumasorg.
Bid asseblief
- Bid dat God wonderbaarlik ʼn vreedsame oplossing vir die voortdurende gevegte sal bewerkstellig.
- Vra God om Sy mense wat geweld in die gesig staar omdat hulle Hom volg, te bewaar.
- Bid dat God fisies, geestelik en emosioneel vir Christene in die SAR sal voorsien.