14Mali

Die Islamitiese ekstremistiese opstand wat Mali se noorde in 2012 verwoes het, het steeds ʼn groot impak op die land se klein aantal Christene. Kerke is afgebrand en baie Christene het hul huise verloor en moes uit die streek vlug. Alhoewel sommige Christene en gemeentes onder polisiebeskerming kon terugkeer, leef hulle steeds onder die bedreiging van aanvalle.

Diegene wat in gebiede woon wat deur militante beheer word, is toegang tot water en grond geweier om gewasse te verbou. Gelowiges wat aan evangelisasie-aktiwiteite in die noorde deelneem, is veral kwesbaar vir geweld. Christen-sendelinge leef ook voortdurend onder die bedreiging van ontvoering deur jihadiste. Diegene wat Islam verlaat om Jesus te volg, staar geweld en druk van hul families en gemeenskappe in die gesig indien hul nuwe geloof ontdek word.

Die jihadistiese geweld versprei suidwaarts en die land se instellings verkrummel teen ʼn vinnige tempo. Só word daar verder in die jihadistiese groepe se hande gespeel. Die land ontaard ook in ʼn geopolitieke slagveld tussen die weste en ooste, wat Christene vir regeringsverwante vervolging kwesbaar maak.

Ontmoet Adama

“Ons leef onder groot bedreigings in ons gebied (noordelike Mali) en die vrees neem daagliks toe. Daar is ontvoerings, allerlei aanvalle en selfs struikrowery in die stad… Bid asseblief vir ons dat God Sy kinders veilig sal hou.”

Adama (naam verander), ʼn kerk se pastoor in Gao.

Wat doen Geopende Deure om te help?

Geopende Deure werk deur plaaslike vennote in Mali om vervolgingsvoorbereidheidsopleiding, dissipelskapprogramme en ekonomiese bemagtigingsprojekte te voorsien.