41Katar

Die Christene in Katar is óf werkers uit nie-Moslem-lande óf mense vanuit ʼn Moslem-agtergrond – en die twee groepe het min interaksie met mekaar. Daar is baie trekarbeiders in Katar wat toegelaat word om die Christelike geloof te beoefen, solank hulle by Katar se reëls hou.

Daar is ʼn amptelike godsdienskompleks buite die hoofstad, Doha, waar ʼn uitgesoekte aantal kerke toegelaat word om bymekaar te kom. Katarese burgers word egter nie toegelaat om daar in te gaan nie en migrerende Christene mag nie met Moslems oor Christenskap praat nie. As hulle dit doen, kan hulle gearresteer of gedeporteer word.

Katarese burgers en migrante van Moslem-families wat in Jesus glo, kan nie hul Christenskap openlik uitleef nie en kan diskriminasie, teistering en polisiemonitering in die gesig staar. Om jou geloof vanaf Islam te verander, word nie amptelik erken nie. Dit kan tot probleme lei in terme van huwelike en eienaarskap van eiendomme.

Katar gebruik toenemend gevorderde tegnologie om beide burgers en immigrante te monitor. Dit veroorsaak dat Christene in Katar versigtiger moet wees in hul optrede. ʼn Mens hoor selde dat Christene liggaamlik aangerand word weens hul geloof, omdat gelowiges vanuit ʼn Moslem-agtergrond hul geloof geheim hou.

Ontmoet Nadia

“Die risiko’s is baie werklik – nie net vir die individu nie, maar ook vir die persoon se uitgebreide familie, wat deur hul verbintenis met ons skaam kry. Dit is baie uitdagend om ʼn kerk en ander gelowiges te vind. Daar is baie vrees en wantroue. Jy kan dalk met iemand praat wat nie ʼn gelowige is nie, maar net voorgee om een te wees.”

Nadia (naam verander), Arabiese Skiereiland.

Wat doen Geopende Deure om te help?

Geopende Deure ondersteun die Liggaam van Christus op die Arabiese Skiereiland deur gebede te organiseer, Skrif-hulpbronne te versprei en gelowiges en pastore op te lei.