26Turkmenistan
Geen godsdiensvryheid bestaan in Turkmenistan nie. Die diktatoriale regering gebruik ʼn groot netwerk van polisie, geheime dienste en plaaslike imams om alle godsdiensaktiwiteite fyn te monitor. Godsdienstige groepe word wetlik verplig om by die owerhede te registreer. Slegs diegene wat ten minste 50 lede bo die ouderdom van 18 het, word toegelaat om dié roete te volg en nie-geregistreerde groepe word summier verban.
Kerke is die teiken van polisieklopjagte, wat daartoe kan lei dat bywoners van kerkdienste gearresteer of beboet word. Boetes kan uitgereik word vir die hou van onwettige byeenkomste, die besit van godsdienstige materiaal en selfs die aflaai van Christelike liedere. Die druk en invoer van Christelike materiaal is beperk – dit lei tot ʼn gebrek aan hulpbronne om plaaslike Christene te ondersteun. Selfs Russies-Ortodokse kerke word gemonitor.
Die bevolking is oorwegend Moslems en die Christendom word met agterdog benader.
Die staat plaas Christene uit ʼn Moslem-agtergrond, hul families en gemeenskap onder groot druk. Hierdeur kan hulle onderwerp word aan huisarres, gedwonge huwelike en aanrandings om hulle te probeer dwing om na Islam terug te keer.
Bid asseblief
- Vir waagmoed vir kerkleiers wat onder druk vanaf die owerhede verkeer. Bid dat hulle sal vasstaan in hul geloof en as ʼn dapper voorbeeld vir hul gemeentes sal dien.
- Vir genesing vir vroue wat weens hul geloof huishoudelike geweld deurgemaak het.
- Dat Bybels en Christelike materiaal hul weg veilig na Christene sal vind, sonder onderskepping deur die owerhede.
Hoe ondersteun Geopende Deure ons familie in Turkmenistan?
Geopende Deure versterk vervolgde Christene in Sentraal-Asië deur die verskaffing van Bybels en Christelike literatuur, Bybelse en beroepsopleiding, sosio-ekonomiese ontwikkelingsprojekte en kinder-, jeug- en vrouebedienings.