12Sirië

Sirië het drie plekke op vanjaar se Wêreldwaarnemingslys geklim, hoofsaaklik weens ʼn toename in gewelddadige vervolging. Jare van konflik en onstabiliteit het ʼn omgewing geskep waarin vervolging floreer sonder om gestraf te word.

In die paar gebiede wat deur Islamitiese militante beheer word, word kerkleiers veral geteiken vir ontvoerings of aanvalle omdat hulle groter openbare sigbaarheid het. Dit is daarop gemik om die Christen-gemeenskap te intimideer. Die meeste kerkgeboue is afgebreek of in Islamitiese sentrums omskep.

Openbare uitdrukkings van die Christelike geloof word verbied, en kerkgeboue mag nie herstel word nie. Evangelisering en bekering tot Christenskap word selfs in regeringsbeheerde gebiede as ʼn bedreiging vir sosiale stabiliteit gesien, en dit word dus erg onderdruk.

Gelowiges vanuit ʼn Moslem-agtergrond ervaar veral druk vanaf hul families en gemeenskappe omdat hul bekering as ʼn klad op die familie se eer beskou word. Bekeerlinge loop die risiko om uit hul families verdryf te word, of selfs erger.

In noordelike Sirië word godsdienstige minderhede (insluitende Christene) deur Turkse magte en gepaardgaande Islamitiese militêre magte vervolg. Hulle word aangeval, doodgemaak, ontvoer en verkrag. Baie godsdienstige terreine word ook erg beskadig.