37Mosambiek

Die opkoms van Islamitiese ekstremisme in die noorde van die land, veral in streke soos Cabo Delgado, het ʼn verwoestende impak op die lewens van gelowiges gehad. Kerke is afgebrand, pastore is ontvoer en baie mense is doodgemaak. Die doel van hierdie groepe is om ʼn streng Islamitiese staat daar te stel en Christene word dikwels as simbole van weerstand teen hierdie ekstremistiese ideologie geteiken.

Hiermee saam word Christene dikwels in die kruisvuur van die voortdurende konflik tussen owerheidsmagte en jihadistiese groepe vasgevang, wat daartoe lei dat hulle selfs meer kwesbaar vir geweld en ontworteling is.

Mosambiek het ook ʼn belangrike middelpunt vir dwelmhandel geword, met die teenwoordigheid van kartelle wat bydra tot ʼn klimaat van wetteloosheid en geweld, wat die Christelike gemeenskap indirek raak. Kerkjeugwerkers is veral in gevaar, aangesien hulle dikwels as bedreigings vir die kartelle gesien word omdat hulle hulself teen hierdie bendes uitspreek en probeer om potensiële “rekrute” te beskerm.

Bekeerlinge vanuit Islam of tradisionele Afrika-godsdienste is kwesbaar vir vervolging deur hul eie families. Dit kan onder andere egskeiding of gedwonge huwelike insluit, en daartoe lei dat hulle toesighouding oor hul kinders verloor of onterf word. In die oostelike Moslem-meerderheidsgebiede word Christen-vroue en -meisies gedwing om aan die Islamitiese kleredragvereistes in alle Moslem-skole en publieke areas te voldoen.

Ontmoet pastoor Mario

“Ons Christene in Mosambiek is die teikens van ernstige vervolging. Baie gelowiges word verkrag of doodgemaak, en verskeie kerke en huise word vernietig.”

Pastoor Mario (naam verander), ʼn kerkleier in Mosambiek.

Wat doen Geopende Deure om te help?

Geopende Deure ondersteun vervolgde Christene in die noorde van Mosambiek deur noodleniging, vervolgingsvoorbereidheidsopleiding en ekonomiese bemagtigingsprojekte te verskaf.