Soos talle ander lande in Sentraal-Asië, het Kasakstan talle uitdagings vir gelowiges. Die land se godsdiensvryheid word voortdurend bedreig sedert die instelling van wetgewing in 2011 wat die regering grootskaalse beheer oor godsdiens gegee het. Hiervolgens kan Christene verhoogde monitering, klopjagte tydens vergaderings, arrestasies en tronkstraf in die gesig staar.

Kerke buite die Russies-Ortodokse Kerk (wat meestal geduld word solank hulle nie probeer om die Evangelie met Moslems te deel nie) loop voortdurend die gevaar van grootskaalse monitering en onderdrukking deur die staatsowerhede.

Bekeerlinge vanaf Islam word aan die ergste vervolging blootgestel. Hulle kan deur hul families toegesluit word, aangerand word en uiteindelik uit hul gemeenskappe geskop word, wat hulle sonder hulpbronne of verhoudings laat. Plaaslike godsdiensleiers preek ook teen bekering.

Christene van regoor Kasakstan ervaar ook diskriminasie en struikelblokke om ʼn bestaan te maak. In sommige dele van die land word van sekere Christelike ondernemings verwag om omkoopgeld te betaal om sake te kan doen. Dié afpersing spoor sommige sake-eienaars aan om hul geloof geheim te hou. Sommige gelowiges, veral kerkleiers, verloor ook hul werk.

Ontmoet Samil

“Dit is vir my baie moeilik om die vervolging in die familie te verduur. Maar God het oor die jare soveel gedoen, ek het soveel wonderwerke van God gesien.”

Samil (naam verander), ʼn Christen van Sentraal-Asië.

Wat doen Geopende Deure om te help?

Geopende Deure versterk vervolgde Christene in Sentraal-Asië met die verskaffing van Bybels en Christelike literatuur, Bybelse en beroepsopleiding, sosio-ekonomiese ontwikkelingsprojekte en kinder-, jeug- en vrouebedienings.