36Bhoetan

Ten spyte van die Bhoetanese regering se verklaring dat godsdienstige organisasies nie hoef te registreer nie, bly dit uitdagend om saam met ander gelowiges in Bhoetan te aanbid. Geen kerk word amptelik deur die Bhoetanese regering erken nie en dit bring mee dat alle Christelike aanbiddingsgemeenskappe tegnies onwettig funksioneer.

Daar word van alle Bhoetanese burgers verwag om Boeddhisme, die staatsgodsdiens, te volg. Enigeen wat tot die Christendom bekeer, sal met agterdog dopgehou word – en hul omliggende gemeenskap, plaaslike Boeddhistiese leiers en familie sal waarskynlik probeer om hulle na hul vorige godsdiens terug te lok. Evangeliese en Pinkster-gemeenskappe loop die gevaar van die owerhede se monitering en strooptogte.

Plaaslike leiers kan weier om Christene van die nodige dokumentasie te voorsien om basiese take te verrig. Dit sluit in aansoeke vir lenings, die registrasie van eiendomme, werksaansoeke en die hernuwing van ID-kaarte. Hierbenewens word die Christelike gemeenskap ook burgerskap geweier. Dit het ʼn negatiewe impak op gelowiges se vermoë om sake te doen, eiendom te besit of hoër onderwys te ontvang. Christene word ook gedwing om Boeddhistiese rituele as deel van paramilitêre opleiding te volg.

Ontmoet James Sherpa

“In Geopende Deure-vennote se seminaar het ek geleer dat ons soos Timoteus getrou, betroubaar en opreg moet wees. Ek het geleer dat ons God met ons lewens moet verheerlik en dat ons vervolging moet aanvaar, want dit is onvermydelik in ons lewens. Dankie dat julle ons toerus.”

James Sherpa (naam verander), ʼn jong Bhoetanese Christen.

Wat doen Geopende Deure om te help?

Geopende Deure werk deur plaaslike vennote om vervolgde Christene in Bhoetan te versterk deur gebedsondersteuning en ander praktiese hulp.