21Marokko

Marokko se bevolking is 99% Moslem en bly sosiaal konserwatief ten spyte van ʼn groeiende Westerse invloed op die samelewing. Dit maak die lewe baie uitdagend vir die klein Christelike minderheid, veral diegene wat vanuit Islam tot bekering gekom het. Die waarskynlikheid is groot dat hulle deur hul familie en die gemeenskap onder druk geplaas sal word om hul Christelike geloof te verlaat. Hulle moet in huiskerke vergader omdat hulle nie toestemming of amptelike erkenning kan kry om in die openbaar bymekaar te kom nie.

Alhoewel bekering nie wetlik ʼn strafbare oortreding is nie, loop bekeerlinge die risiko om deur die regering gearresteer en ondervra te word. Die sterk en goed ingeligte veiligheidsdienste maak dit moeilik vir gelowiges om hul geloof openlik uit te leef. Een van die redes hiervoor is die vrees vir radikale Moslem-groepe. Die regering probeer om deur streng monitering van die situasie hierdie groepe te paai en enige onrus te voorkom.

Die regering se paranoia verduidelik waarom dit onwettig is om “ʼn Moslem in sy geloof te laat twyfel”, wat beteken dat Christene wat oor hul geloof praat inhegtenisneming en kriminele vervolging in die gesig staar. Die verspreiding van Christelike hulpbronne in Arabies (insluitend Bybels) word ook beperk. Gelowiges moet boonop baie versigtig wees oor enigiets wat hulle op sosiale media plaas.

Christen-immigrante is relatief vry om te bymekaar te kom en te aanbid. Hulle word egter dikwels gemonitor en loop die risiko om gedeporteer te word as dit bekend word dat hulle hul geloof met Moslems deel.

Ontmoet Aizah

“My pa het my uit die huis geskop. Hy het gesê dat ek ons ​​kultuur verraai het, dat ek nie meer sy dogter is nie. Dit het my hart gebreek. Hy het my soos ʼn slegte meisie laat voel.”

Aizah (naam verander) van Noord-Afrika.

Wat doen Geopende Deure om te help?

Geopende Deure werk saam met plaaslike vennote en kerke in Noord-Afrika om leierskap- en dissipelskapopleiding, regshulp, traumaberading, lewensbestaanondersteuning, Bybels en pastorale sorg te voorsien.