21Laos

Teenoor verlede jaar het geweld regoor die land vanjaar aansienlik toegeneem – ʼn skokkende toename selfs vir ʼn plek wat aan fisiese dreigemente gewoond is. Christene is uit hul gemeenskappe geskop, hul huise is vernietig en hulle het geweldig baie verduur omdat hulle Jesus gevolg het.

Op plaaslike vlak word godsdienstige aktiwiteite in sommige dele van die land streng deur die Kommunistiese owerhede gemonitor. In dié gebiede het kerkleiers gevalle aangemeld van plaaslike owerhede wat huiskerke sluit, wat tegnies onwettig is. Selfs geregistreerde kerke word gemonitor.

Bekeerlinge tot Christenskap gaan gebukkend onder bykomende trauma. Omdat hulle as verraaiers in hul gemeenskappe gesien word, wat die geeste kwaad gemaak het, kan hulle druk en geweld van hul gesinne en plaaslike owerhede ondervind. Dit is bekend dat gesinne die plaaslike gemeenskap aanhits, wat dikwels bekeerlinge uit hul huise en dorpe verdryf.

Ontmoet Maixay

“Wanneer ek hoor van iemand wat vervolg word, gaan ek dadelik na hulle toe, want ek wil nie hê hulle moet hul geloof in God prysgee nie. Ek is bevrees dat hulle God sal verlaat, wat baie ontmoedigend sal wees. Ek vra uit wat hul behoeftes is en bespreek dit dan met my kerk en met mense met dieselfde gesindheid, soos Geopende Deure, om dié gelowiges te help en in hul behoeftes te voorsien.”

Maixay (naam verander), ʼn gelowige in Laos.

Wat doen Geopende Deure om te help?

Geopende Deure se plaaslike vennote versterk vervolgde gelowiges in Laos deur Christelike materiaal, leierskap- en dissipelskapopleiding, sosio-ekonomiese ontwikkelingsprogramme, voorspraakondersteuning en noodleniging te verskaf.