43Kameroen

Die verspreiding van Islamitiese ekstremistiese ideologie versnel steeds, veral in die land se noordelike gebiede met die teenwoordigheid van ʼn groot Moslem-bevolking. Dit beteken dat bekering vanaf Islam na Christenskap hier gevaarliker is as ooit tevore. In dié dele van Kameroen word nuwe bekeerlinge dikwels gedwing om hul geloof in geheimhouding te beoefen, en die besit van Bybels of enige Christelike literatuur kan tot dreigemente en aanrandings lei.

Boko Haram en ISWAP se dreigende intimidasie in die Verre Noorde-streek is ook ʼn voortdurende bron van kommer. In dié deel van Kameroen staar Christene die moontlikheid van ontvoering, seksuele geweld, gedwonge ontworteling en die dood in die gesig. Boonop word kerklike aktiwiteite op ʼn groot skaal ontwrig en kan talle kerke weens aanvalle, ontworteling en regeringsdruk nie funksioneer nie.

Voortdurende gevegte tussen die regering en rebellegroepe het die Kerk geraak, met sommige rebellegroepe wat Christene teiken. En die humanitêre krisis in die naburige Sentraal-Afrikaanse Republiek (SAR) het ʼn aaneenlopende omwenteling geskep. Talle SAR-Christene het gevlug en skuiling in Kameroen gesoek.

Ontmoet Rukayyatu

“Die Woord van God is die bron van my hoop en krag. Boko Haram het my geluk weggeneem toe hulle my Bybel verbrand het.”

Rukayyatu (naam verander), ʼn vrou van die Verre Noorde-streek van Kameroen wie se dorpie deur Boko Haram aangeval is.

Wat doen Geopende Deure om te help?

Geopende Deure werk deur plaaslike vennote om vervolgde Christene in Kameroen te versterk deur noodlenigingshulp, traumasorg, ekonomiese bemagtigingsprojekte en geestelike sorg vir nuwe gelowiges te verskaf.