skip to Main Content

Vervolging van Christene neem erg toe op Afrika-kontinent te midde van Covid-19-pandemie

Geopende Deure Internasionaal het op 13 Januarie hul 2021 Wêreldwaarnemingslys (WWL) bekendgestel. Hierdie jaarlikse lys kondig die top 50 lande in numeriese volgorde aan waar Christene die ergste vervolging vir hul geloof ervaar. Die algemene tendens in hierdie wêreldwye opname, wat monitor hoe moeilik dit is om as ʼn Christen te leef, wys dat die vervolging van Christene teen ʼn kommerwekkende tempo in Afrika toeneem en dat die koronavirus-pandemie diskriminasie teenoor Christene verder vererger het.

Noord-Korea is vir die 20ste jaar in ʼn ry bo-aan die lys. Hierdie land is sedert 2002 deurlopend aan die voorpunt van die rangorde as die land met die ergste vervolging van Christene. Kort op sy hakke is Afganistan in die tweede plek en Somalië in die derde plek.

Slegs onder die lys se top 50 lande, ervaar meer as 309 miljoen Christene – dit is een uit elke agt Christene – regoor die wêreld ernstige vervolging vir hul geloof. Oor die algeheel staar Christene in 74 lande ʼn vlak van vervolging in die gesig wat as uiterste vervolging, baie hoog of hoog gemeet word.

 

Drastiese styging in vervolging in Afrika

Vanjaar se lys onthul dat die vervolging van Christene wêreldwyd en spesifiek in Afrika drasties toegeneem het. Selfs sommige van Suid-Afrika se buurlande, soos Mosambiek, verskyn op die lys. ʼn Totaal van 19 uit die 50 lande op die lys is op die Afrika-kontinent en vier Afrikalande is onder die top 10. Een uit elke ses Christene in Afrika staar nou ernstige vervolging in die gesig weens hul geloof. Geweld teen die Kerk regoor sub-Sahara Afrika het die afgelope twee jaar met 30% toegeneem.

Wanneer ʼn mens slegs na die gewelddadige vervolging van Christene kyk, is die slotsom dat vier uit die vyf lande op die ranglys vir die top 5 lande vir geweld op die Afrika-kontinent is. Nigerië is weereens bo-aan die lys as die mees gewelddadige land vir Christene in die wêreld. Die voorval waarin tien Nigeriese Christene op Kersdag in 2019 deur die Islamitiese Staat onthoof is, is nog vars in almal se geheue. Die top 5 lande vir die mees gewelddadige vervolging van Christene is Nigerië (1), Pakistan (2), die Demokratiese Republiek van die Kongo (3), Mosambiek (4) en Kameroen (5).

Die Demokratiese Republiek van die Kongo is vir die eerste keer ooit onder die top 50. Dié land is vanjaar op nr. 40 weens geweld deur die Geallieerde Demokratiese Magte (ADF). ʼn 2020-verslag deur die Verenigde Nasies beraam dat hierdie groep, wat met die Islamitiese Staat verbind word, waarskynlik oorlogsmisdade en ander algemene misdade teen die mensdom gepleeg het. Hulle het sedert die begin van 2019 al meer as 1 000 burgerlikes doodgemaak.

Weens ʼn toename in aanvalle deur Islamitiese ekstremiste die afgelope jaar, het Mosambiek die top 50 betree op nr. 45. Dit is slegs die tweede keer sedert 1993 wat dié land in die top 50 is. Die provinsie Cabo Delgado het sedert 2017 al onder meer as 600 aanvalle deurgeloop waarin meer as 1 150 mense dood is. ʼn Vertakking van al-Shabaab, wat Sharia-wette in die provinsie wil afdwing, is hiervoor verantwoordelik. Meer as 300 000 mense is weens die aanvalle ontwortel.

 

Invloed van die Covid-19-pandemie

ʼn Prominente tendens van die 2021 WWL is dat onderliggende diskriminasie, onregverdige behandeling en die vervolging van Christene deur die globale koronavirus-pandemie beklemtoon en vererger is. Christene word noodleniging in talle lande geweier. Die inperkings beteken dat baie Christene nie kan werk nie en in beperkte ruimtes vasgekeer is saam met diegene wat vyandig teenoor hul geloof is.

Die pandemie het bestaande sosiale, ekonomiese en etniese kwesbaarhede van miljoene Christene wêreldwyd beklemtoon en vererger. Covid-19 dien as ʼn katalisator vir die onderdrukking van Christene in streke en lande vanaf Wes-Afrika tot Somalië (3), Nigerië (9), die Demokratiese Republiek van die Kongo (40), Indië (10), Bangladesj (31), Pakistan (5), Jemen (7), Soedan (13), Mianmar (18), Vietnam (19), Nepal (34) en Maleisië (46).

Die navorsing wys ook dat die Covid-19-beperkings gebruik word om Islamitiese ekstremisme in sub-Sahara Afrika te versprei. In die Sahel-streek, suid van die Saharawoestyn, word Islamitiese ekstremisme deur onregverdigheid en armoede aangevuur. Die gewelddadige Islamitiese groep, al-Shabaab, in Somalië en ander groepe het hulle voorgeneem om “jihad” (ʼn heilige oorlog) teen die “ongelowiges” te voer omdat hulle Christene vir die pandemie blameer.

Die Menseregtekommissie rapporteer dat daar, ondanks Covid-19-sluitings, tussen Januarie en Julie 2020 meer as 85 aanvalle op opvoedingsinstansies in Burkina Faso, Mali en Niger was. Christene het gerapporteer dat die inperkings hulle maklike teikens gemaak het, want dit lyk of die veiligheidsmagte met die plunderaars saamgespan het. Ander Afrikalande wat merkbaar geraak is, is Nigerië (9), die Demokratiese Republiek van die Kongo (40) en Mosambiek (45).

Covid-19 het ook gelei tot die wettiging van verhoogde monitering en beperkings deur outoritêre regerings in lande soos China (17) en Indië (10), wat die behoefte om die pandemie te beheer gebruik het om hul beheer te verstewig. Ander lande wat merkbaar geraak is, is Iran (8), Saoedi-Arabië (14), Laos (22) en Mianmar (18).

In Mexiko (37) en ander Latyns-Amerikaanse lande het die stryd om die koronavirus te bekamp dit moeilik gemaak om georganiseerde misdaad hok te slaan, met dwelmhandelgroepe wat hul eie Covid-19 aandklokreëls in vier Mexikaanse streke ingestel het. In Colombië (30) het georganiseerde misdaadgroepe hul beheer gedurende die pandemie verstewig deur die regering se aandklokreëls en beperkings vir hul eie doeleindes te misbruik.

 

Belangrikste veranderinge op die lys

Die belangrikste veranderinge op die lys sedert WWL 2020 is:

  • Nigerië het die top 10 vir die eerste keer sedert 2015 betree – op nr. 9, ʼn verhoging vanaf nr. 12 verlede jaar.
  • Jemen en Iran het albei een plek gestyg.
  • Indië bly op nr. 10, die posisie wat dit beklee sedert dit die top 10 vir die eerste keer in 2020 betree het, weens stygende Hindoe-nasionalisme.
  • Nigerië het weereens die hoogste telling vir geweld behaal (soos in vorige jare), hoofsaaklik omdat gewapende Fulani-veewagters honderde Christelike dorpe verwoes het, sowel as omdat Boko Haram en ʼn reeks misdaadgroepe aanhou om mense te vermoor, ontvoer en verkrag sonder dat hulle daarvoor gestraf word.
  • Soedan het egter die doodstraf vir afvalligheid van hul nasionale geloof (bv. om Islam te verlaat) afgeskaf. Die tussentydse grondwet wat in 2019 opgestel is, waarborg vryheid van geloof, laat Sharia weg as die primêre bron van wetgewing en spesifiseer Islam nie meer as die staatsgodsdiens nie – hoewel daar steeds baie weerstand is teen sulke drastiese veranderinge na 30 jaar. Die land het van nr. 7 tot nr. 13 gedaal.
  • Irak het van nr. 15 tot nr. 11 gestyg, deels weens die deurlopende onsekerheid van Christene wat na hul huise terugkeer. Christene word steeds doodgemaak, ontvoer en aan fisiese, sielkundige, seksuele en emosionele mishandeling onderwerp. Talle mense in die land wat gevlug het, het ook in die somer van 2020 onder Turkse aanvalle in die Dohuk-gebied deurgeloop.
  • Sirië het een plek gedaal vanaf nr. 11 tot nr. 12. Ten spyte van beter toestande, veral in Koerdies-beheerde gebiede, is daar steeds gewelddadige Islamitiese aanvalle – een in November 2019 het daartoe gelei dat sewe Christene doodgemaak en nog 70 gewond is.
  • China is vir die eerste keer in ʼn dekade in die top 20 en het vanjaar tot nr. 17 gestyg, vanaf nr. 23 in 2020. Die Kommunistiese Party het sy regulering van alle streke in 2020 uitgebrei en selfs regeringsgoedgekeurde kerke, beide Katoliek en Protestant, word voortdurend dopgehou, beide aanlyn en op ander maniere.
  • Vietnam het vanaf nr. 21 tot nr. 19 gestyg. Talle Christelike etniese minderheidsgroepe het gerapporteer dat hulle uitgesluit is van Covid-19-hulpverlening.
  • Turkye het vanaf nr. 36 tot nr. 25 gestyg, hoofsaaklik vanweë sy telling vir geweld. Christene sê dat daar ʼn baie meer openlike Islamitiese en nasionalistiese agenda is sedert die poging tot ʼn staatsgreep teen president Erdogan in 2016.
  • Colombië het vanaf nr. 41 tot nr. 30 gestyg. Na die mislukking van die 2016-vredesooreenkoms het georganiseerde misdaadgroepe aangehou om dele van die land, veral landelike gebiede, te beheer. Hul beheer het gedurende die kwarantyntydperk gegroei omdat hulle die regering se aandklokreëls en ander beperkings vir hul eie doeleindes misbruik het.
  • Bangladesj het van nr. 38 tot nr. 31 gestyg. Ná ʼn aanval deur ʼn gewelddadige Islamitiese groep in Januarie 2020 word twee mans steeds vermis. Verder is ʼn 14-jarige meisie wat ook ontvoer is, skynbaar onder dwang met ʼn militant getroud.
  • Mexiko het tot nr. 37 gestyg (vanaf nr. 52 in 2020, hoewel dit in 2019 op nr. 39 was).
  • Die Demokratiese Republiek van die Kongo het tot nr. 40 gestyg (vanaf nr. 57 in 2020), hoofsaaklik omdat die Islamitiese groep ADF volgens die Verenigde Nasies sedert 2019 sowat 1 000 burgerlikes vermoor het.
  • Mosambiek het die top 50 op nr. 45 betree (verlede jaar op nr. 66) weens die Islamitiese geweld in Cabo Delgado.
  • Kameroen, wat sukkel om konflik en toenemende geweld deur Boko Haram en ander Islamitiese groepe te bekamp, het na nr. 42 gestyg vanaf nr. 48.
  • Die Comore-eilande, oos van Mosambiek, het weer die top 50 betree in posisie nr. 50 (vanaf nr. 54 verlede jaar) ná baie jare se afwesigheid. Die regering ontken godsdiensvryheid vir sy burgers openlik.

 

 

WÊRELDWAARNEMINGSLYS GEBEDSFLITSE

Die Wêreldwaarnemingslys Gebedsflitse fokus op die verskillende lande op die Geopende Deure Wêreldwaarnemingslys. Die weeklikse e-pos gee ʼn kort oorsig oor ʼn land en relevante gebedsversoeke vir die land. Dit sluit ook PowerPoint® skyfies in, wat gebruik kan word in eredienste, aankondigings of ander aanbiedings. Indien jy hierdie weeklikse e-posse wil ontvang, voltooi asseblief die vorm hieronder.

  • This field is for validation purposes and should be left unchanged.
Back To Top
×Close search
Soek