Wêreldwaarnemingslys: China

China het dramaties van #43 tot #27 gespring op hierdie jaar se Wêreldwaarnemingslys. Die Kommunistiese owerhede het aggressiewe skuiwe gemaak om hulle mag en beheer oor die samelewing te behou, en baie beperkinge op Christene is verskerp. Jeugdiges word met geweld van die kerklewe verwyder; aanbidding word via die staat se uitsendingsnetwerk (CCTV), sowel as deur spioene, gemonitor; en onderwysers en mediese werkers word aangesê dat hulle aan geen godsdiens mag behoort nie. Verder het die staat bejaarde Chinese Christene gedreig met die verlies van maatskaplike voordele as hulle aanhou om Christus te aanbid. Christene van ʼn Moslem of Tibettaanse Boeddhistiese agtergrond ervaar die bykomende bedreiging van vervolging deur hul families en godsdienstige gemeenskappe, omdat hulle bekering gesien word as verraad teen hul herkoms. Alle berigte dui daarop dat hierdie vyandighede net sal toeneem namate die Chinese regering voortgaan om enige sienswyses te vervolg wat as ʼn bedreiging beskou word vir sy magswurggreep.