skip to Main Content

260 miljoen Christene wêreldwyd ervaar hoë vlakke van vervolging

Geopende Deure Internasionaal het sy 2020 Wêreldwaarnemingslys (WWL) op 15 Januarie vrygestel. Dié lys word jaarliks saamgestel om die top 50 lande waar Christene die ergste vir hul geloof vervolg word, in numeriese volgorde aan te kondig. Noord-Korea is sedert 2002 bo-aan die ranglys as die land met die ergste vervolging van Christene. Hierdie land is vanjaar weereens bo-aan die WWL, met Afganistan kort op sy hakke in die tweede plek en Somalië in die derde plek.

Volgens die nuutste wêreldwye opname wat monitor hoe moeilik dit is om as ’n Christen te leef, is die algehele tendens dat 73 lande uiterste, baie hoë of hoë vlakke van vervolging ervaar.

Altesaam 260 miljoen Christene op die lys se top 50 lande ervaar uiterste, baie hoë of hoë vlakke van vervolging. ’n Land moet ’n telling van 81 of meer uit 100 behaal om uiterste vervolging te ervaar, 61 punte of meer vir baie hoë vlakke, en 41 punte of meer vir hoë vlakke.

Wêreldwye tendense

Geopende Deure Internasionaal beraam dat minstens ’n verdere 50 miljoen Christene in die 23 lande wat nie hoog genoeg op die ranglys is om vir die top 50 te kwalifiseer nie, hoë vlakke van vervolging ervaar. Altesaam een uit elke agt Christene wêreldwyd ervaar uiterste, baie hoë of hoë vlakke van vervolging.

Die lys sluit aan by wêreldwye beriggewing oor gevalle soos die Pakistani Asia Bibi, wat in Mei 2019 uiteindelik teregstelling vrygespring het om ’n nuwe lewe in Kanada te begin.

In sommige lande, soos China en Eritrea, pas die regerings druk op Christene toe – soms met geweld. Ander magte maak die lewe vir Christene onseker in die Midde-Ooste, Suidoos-Asië, Oos-Afrika en die Sahel.

Spesifieke gevalle van vervolging

Spesifieke gevalle van vervolging teen Christene in die WWL-rapporteringstydperk sluit in:

  • In Sri Lanka is meer as 250 mense, van wie 45 kinders is, op Paassondag in aanvalle op drie kerke en hotelle doodgemaak. Meer as 500 mense is beseer.
  • Altesaam 20 mense is by ’n Katolieke kerk in Jolo in die Suidelike Filippyne in bomaanvalle doodgemaak.
  • In China is staatsgoedgekeurde en “ondergrondse” kerke in minstens 23 provinsies geteister of gesluit. By minstens een staatsgoedgekeurde kerk in Xinjiang word vereis dat gemeentelede in rye moet aanmeld vir gesigsherkenning-kontrole.
  • In die Wes-Afrikaland Burkina Faso het gewelddadige Islamitiese militante kerkleiers doodgemaak, families vir lospryse ontvoer en skole en kerke afgebrand.
  • In Egipte is sewe Koptiese Christene doodgemaak toe terroriste hul bus aangeval het tydens ’n besoek aan ’n klooster. Die aanval het op dieselfde plek plaasgevind waar 28 Koptiese Christene minder as 18 maande tevore doodgemaak is toe gemaskerde gewapende mans op hul voertuie losgebrand het.
  • In Iran is 194 Christene gearresteer, waarvan 114 in een week voor Kersfees 2018 aangekeer is. Verskeie huiskerke in nege stede is geplunder.

Toename in vervolging

Die enigste verandering in die top 10 lande sedert die 2019 WWL is dat Soedan en Eritrea hul nr. 6- en nr.7-plekke omgeruil het. In Soedan het min tot dusver vir die nasie se Christene verander, ondanks die verdrywing van president Al-Bashir ná meer as 30 jaar.

Die Verenigde Nasies het in Mei 2019 gehoor dat honderde Christene in Eritrea gevangenskap in die gesig staar omdat godsdiensvryheid voortdurend ontken word. Die regering het in Junie skielik al 22 gesondheidsklinieke wat deur Katolieke bedryf word, oorgeneem en gesluit. Vyf Ortodokse priesters is ook gearresteer. Eritrea se Ortodokse patriarg, wat in 2007 deur die regering onder huisarres geplaas is, is in Augustus uit sy eie kerk geskors weens beskuldigings van kettery deur regeringsgesinde biskoppe.

Top 11 lande: Uiterste vlak

Die top 11 lande op die 2020-lys ervaar ’n uiterste vlak van vervolging.

Indië, wat die top 10 vir die eerste keer op die 2019 WWL gehaal het, bly vanjaar op nr. 10. Nasionalistiese Hindoe-ekstremisme het in dié land gegroei nadat die BJP-regering onder Narendra Modi in Mei 2019 vir ’n tweede termyn verkies is. WWL-analiste het vanjaar minstens 447 insidente geregistreer. Minder Christene is egter doodgemaak as verlede jaar.

Twee van die wêreld se digste Christelike bevolkings, een in ’n sekulêre demokrasie en die ander in ’n kommunistiese staat, ervaar uiterste (Indië) en baie hoë (China) vlakke van vervolging – hoewel dit op baie uiteenlopende maniere plaasvind. China het vanjaar vier plekke op die lys gestyg, van nr. 27 op die 2019 WWL tot nr. 23.

Die gemiddelde telling vir druk op Chinese Christene het gestyg. Dit het op alle vlakke van die samelewing toegeneem, aangesien nuwe regulasies oor godsdiens landwyd ingestel is. Dit het nie net die sogenaamde ondergrondse huiskerke beperk nie, maar ook staatsgoedgekeurde kerke in die Drie-Self Patriotiese Beweging (TSPM) en Chinese Katolieke Patriotiese Vereniging.

Godsdiens word uit die openbare sfeer in China verban; sommige onderwysers en mediese personeel word selfs gedwing om dokumente te onderteken wat verklaar dat hulle geen godsdienstige geloof beoefen nie. Bejaarde mense word vertel dat hul pensioene ingekort sal word as hulle nie hul Christelike geloof verwerp nie. Dit alles gebeur teen ’n agtergrond van toenemende allesomvattende waarneming deur gesigsherkenning en ander tegnologie.

Toename in druk

Die druk neem oral in die top 50 lande toe. Altesaam 34 lande het in 2020 ’n baie hoë vlak van vervolging geregistreer. Verlede jaar was dié syfer 29.

Nigerië, wat steeds op nr. 12 op die lys is, het net soos op die 2019 WWL die maksimum punt vir geweld behaal. Dit kan grootliks toegeskryf aan gewelddadige Fulani-militante wat Christelike gemeenskappe en kerke aanval, sowel as Boko Haram en verskeie groepe gewapende misdadigers wat ongeskonde daarvan afkom terwyl hulle mense doodmaak, ontvoer en verkrag.

Merkbare veranderinge

Daar was oor die algemeen min veranderinge in nr. 13 tot 25 op die lys sedert WWL 2019. Die belangrikste uitsonderings is:

  • Algerië het opgeskuif tot op nr. 17 (vanaf nr. 22 op WWL 2019). Net onder een uit drie van die geskatte 129 000 Christene word met 46 kerke van die Eglise Protestante d’Algerie (EPA) verbind. Elf EPA-kerke is gesluit in die twaalf-maande-tydperk wat deur die lys gedek word (van 1 November 2018 tot 31 Oktober 2019).
  • Marokko het tot nr. 26 gestyg (vanaf nr. 35 op WWL 2019) en Katar het tot nr. 27 gestyg (vanaf nr. 38 op WWL 2019). Baie hoë tot uiterste druk word in alle sfere van die samelewing ervaar (vir kerklike bedrywighede). Hierdie twee lande het algeheel slegs drie of vier punte meer as verlede jaar behaal.
  • Burkina Faso het opgeskuif na nr. 28 (vanaf nr. 61 in WWL 2019). Dié land in Wes-Afrika het vinniger en verder as enige ander land op die lys gestyg; dit was op WWL 2019 nie eers onder die top 50 nie. Minstens 50 Christene is al geteiken en vir hul geloof doodgemaak. Gewelddadige Islamitiese militante het dorpenaars in die noorde wat kruise dra, geteiken en vermoor. Kerke, skole en Christelike nie-regeringsorganisasies is aangeval of moes uit vrees sluit; militante wat hulle aanval, kom ongeskonde daarvan af. Burkina Faso se telling vir geweld het sedert WWL 2019 verdubbel – in ’n land wat voorheen in dié streek bekend was vir sy godsdienstige verdraagsaamheid en gebrek aan konflik.
  • Sri Lanka het tot nr. 30 gestyg (vanaf nr. 46 op WWL 2019). Dit word aan die Paasfees-bomaanvalle in April 2019 toegeskryf.
  • Bangladesj het tot nr. 38 gestyg (vanaf nr. 48 op WWL 2019). Die bedreiging van geweld vanaf Islamitiese militante hou ’n gevaar vir die kerk in.
  • Colombië het tot nr. 41 gestyg (vanaf nr. 47 op WWL 2019). Die konflik duur voort omdat die regering se vredesooreenkoms van 2016 heeltemal verbrokkel het. Kerkleiers word doodgemaak, terwyl ander doodsdreigemente ontvang omdat hulle weier om beskermingsgeld aan gewapende groepe te betaal.

Behalwe vir die 50 lande op die WWL, dui ’n addisionele 23 lande (wat nr. 51 tot 73 op die ranglys is) se telling op dieselfde hoë vlak van vervolging as dié wat onderaan die top 50 is – die Russiese Federasie, Verenigde Arabiese Emirate, Kameroen, Indonesië en Niger. Terwyl Indonesië vanjaar vanaf posisie nr. 30 tot nr. 49 gedaal het, het Kameroen (48) vanjaar die top 50 vir die eerste keer betree. Niger (50) het die top 50 weereens betree, hoofsaaklik weens die styging in radikale Islamitiese invloede regoor sub-Sahara Afrika.

WÊRELDWAARNEMINGSLYS GEBEDSFLITSE

Die Wêreldwaarnemingslys Gebedsflitse fokus op die verskillende lande op die Geopende Deure Wêreldwaarnemingslys. Die weeklikse e-pos gee ʼn kort oorsig oor ʼn land en relevante gebedsversoeke vir die land. Dit sluit ook PowerPoint® skyfies in, wat gebruik kan word in eredienste, aankondigings of ander aanbiedings. Indien jy hierdie weeklikse e-posse wil ontvang, voltooi asseblief die vorm hieronder.

  • This field is for validation purposes and should be left unchanged.
Back To Top
×Close search
Soek